Մամուլում տարածված այն տեղեկատվությունը, թե գազի գնի հարցում պետությունը պարտքեր է կուտակում, որի գինը հասնում է շուրջ 10 մլն դոլարի, չի համապատասխանում իրականությանը։
Տեղեկատվության հերքմամբ հանդես եկավ Էներգետիկ ենթակառուցվածքների ու բնական պաշարների նախարարի պարտականությունները կատարող Գարեգին Բաղրամյանը՝ նշելով, որ որևէ պարտք պետության կողմից չի կարող կուտակվել։ Իրականում՝ «Գազպրոմ Արմենիա» ընկերությունը մշակել է որոշակի առաջարկություններ, թե ինչի հաշվին է իրականացվելու գնի սուբսիդավորումը և այդ առաջարկությունները պետք է քննարկի ռուսական «Գազպրոմ» ընկերության հետ։
Հայ-ռուսական միջկառավարական նիստում վերջերս ձեռք է բերվել պայմանավորվածություն, որ մինչև հուլիսի 1-ը կներկայացվի համաձայնագրի նախագիծ, որում կներկայացվեն սահմանին գազի գնի ձևավորման մեխանիզմները, համաձայնագիրը կլինի հնգամյա։ Սա կապահովի կանխատեսելիությունը և նախօրոք հնարավոր կլինի իմանալ՝ ինչքան է լինելու գազի առավելագույն գինը սահմանին։
Լրատվամիջոցները նաև հարցադրումներ էին կատարել, թե ինչու «Գազպրոմ Արմենիայում» օպտիմալացում կատարելու գործընթացը մեկնարկեց հենց այս փուլում։ Ի պատասխան այս հարցադրման՝ հարկ է նշել, որ խնդիրները օրենսդրական մակարդակում էին։ Մինչև 2019 թվականի հունվարի 1-ը Ռուսաստանի ու Հայաստանի միջև գործում էին միջպետական համաձայնագրեր, որոնք ունեին սահմանափակումներ, այդ պատճառով էլ Հանրային ծառայությունները կարգավորող հանձնաժողովը չէր կարող որևէ փոփոխություն իրականացնել։
Մեկնաբանություններ
Մեկնաբանություն թողնելու համար պետք է մուտք գործել կամ գրանցվել:
Մուտք Գրանցվել