Շաբաթներ առաջ հայտնել էինք, որ Ֆեյսբուքի հայկական տիրույթում գործող երգիչ Արմեն Մովսիսյանի էջը հափշտակվել է ադրբեջանցի հաքերների կողմից։
«Anti-armenia Team» կոչվող հաքերային խումբը պարբերաբար կեղծ տեղեկություններ է տարածում էջի անունից, որի արդյունքում հայ հասարակությունը հայտնվում է մոլորության մեջ։ Հայոց ցեղասպանության տարելիցին ընդառաջ՝ խումբը հերթական կեղծիքն է տարածել։
Այսպես, ապրիլի 19-ին էջում հայտնվում է ՀՀ քաղաքացու անձնագրի լուսանկար, որին կցված է գրառում՝ «հարգելի ընկերներ, տարածեք, ում ա ծանոթ, թող արձագանքեն գան վերցնեն»։ Այս հրապարակումը ունենել է 6400 «կիսում» և լայն տարածում է գտել համացանցում։
Ապրիլի 24-ին, սակայն, լուսանկարին կից գրառումը խմբագրվում է՝ վերածվելով հակահայկական քարոզչության։ Խմբագրված գրառման մեջ նշված է, որ Մեծ եղեռնը հորինվածք է, թուրքերը երբեք մասսայական սպանություններ չեն իրականացրել, ընդհակառակը, կոտորածն իրականացվել է հայերի կողմից։
Արդյունքում՝ ավելի քան 6400 հայ օգտատեր, տարածելով Հայաստանի քաղաքացու կորած անձնագրի լուսանկարը, դարձել է ադրբեջանական հաքերների՝ նախապես ծրագրավորած խաբեության զոհ։
Մեկնաբանություններ
Մեկնաբանություն թողնելու համար պետք է մուտք գործել կամ գրանցվել:
Մուտք Գրանցվել