Ապրիլի 27-ին քաղաքացու օրվան նվիրված տոնական միջոցառումներ իրականացվեցին Հայաստանի մարզերում և մայրաքաղաք Երևանում։ Միջոցառումների համար նախատեսվել էր 124 մլն դրամ:

Որոշ լրատվամիջոցներում տեղեկություն տարածվեց, որ միջոցառումներ կազմակերպող մի քանի ընկերություններ «գոյություն չունեն»։ Նման պնդման հիմք էր հանդիսացել Էլեկտրոնային ռեգիստրի որոնողական համակարգում կատարած որոնումը, ինչի արդյունքում լրատվամիջցը չէր գտել ընկերության անունը էլեկտրոնային գրանցամատյանում։

Իրականում, սակայն, ընկերությունները գոյություն ունեն և առկա են իրավաբանական անձանց էլեկտրոնային ռեգիստրում։ Մասնավորապես, Սյունիքի և Վայոց ձորի մարզերում միջոցառումները կազմակերպել է «Գևորգ Աղաբալյան Հակոբի» ընկերությունը՝ (https://www.e-register.am/am/companies/1161235) «Էքս Փրոդաքշըն»-ը, որը գործունեություն է ծավալում 2008 թվականի հուլիսից։ Կոտայքի մարզում՝ «Յունիթի Փրոդաքշընը»՝ Մհերյան Ալեքսանդր ընկերությունը՝ (https://www.e-register.am/am/companies/347168) հիմնադրված 2011 թվականի սեպտեմբերին, իսկ Գեղարքունիքի մարզում՝ «Զաքարյան Արտյոմ Արտյոմի» ընկերությունը (https://www.e-register.am/am/companies/82279), որը հիմնադրվել է դեռ 1997 թվականին։