Կորոնավիրուսի տարածումն աշխարհում ուղեկցվել և ուղեկցվում է իրականությանը չհամապատասխանող տեղեկատվությամբ։ Չնայած, որ կեղծ լուրերը մինչ օրս էլ արդիական են, այնուամենայնիվ, թե՛ Առողջապահության համաշխարհային կազմակերպությունը (The World Health Organization), թե՛ տարբեր երկրների առողջապահական գերատեսչությունները ծանոթ են թեմայի շուրջ պտտվող կեղծիքներին և ակտիվորեն արձագանքում են դրանց՝ կանխելով ապատեղեկատվության տարածումը։

Համեմատաբար նոր միտում են կիբեռհանցագործների կողմից իրականացվող ֆիշինգային հարձակումները. օգտվելով կորոնավիրուսի հետ կապված մարդկանց մտահոգ վիճակից՝ փորձ է արվում  հանդես գալով Առողջապահության համաշխարհային կազմակերպության անունից: Չնայած Հայաստանում կորոնավիրուսով վարակման ու կիբեռհարձակման նման դեպքեր չեն արձանագրվել, այնուամենայնիվ, Անձնական տվյալների պաշտպանության գործակալությունը կոչ է անում լինել զգույշ, ու կորոնավիրուսի վերաբերյալ նամակներ կամ էլ. հաղորդագրություններ ստանալիս՝

•  ստուգել ուղարկողի հասցեն
•  չսեղմել հաղորդագրության մեջ տեղադրված հղումներին ու կցված ֆայլերին
• չտրամադրել անձնական տվյալները (մուտքանուն, գաղտնաբառ) կասկածելի հաղորդագրությամբ դիմողներին

ԱՀԿ-ն ևս զգուշացնում է, որ իրենց անունից ստեղծված կեղծ էջեր են գործում, որոնք փորձում են անձնական տվյալներ շորթել մարդկանցից և տարատեսակ գործարքներ իրականացնել։ Կազմակերպությունը խորհուրդ է տալիս մշտապես ստուգել ուղարկված էլեկտրոնային հաղորդագրությունների հասցեն, եթե «@» սիմվոլից հետո «who.int»-ից բացի առկա է որևէ այլ սիմվոլ, ապա դա միանշանակ ուղարկված չէ Առողջապահության համաշխարհային կազմակերպության կողմից։ ԱՀԿ-ն չի ուղարկում «@ who.com», «@ who.org» կամ «@ who-safety.org» և այլ հասցեներից նամակներ։ Նախքան հաղորդագրությունը բացելը՝ համոզվեք, որ այն ուղարկված է «https://www.who.int» հասցեից։ Եվ, որ ամենակարևորն է, միշտ համոզվեք, թե ինչ նպատակով են ձեզանից որևէ ինֆորմացիա ուզում ստանալ։

Առողջապահության համաշխարհային կազմակերպության անունից հանդես գալը կիբեռհանցագործների միակ գործիքակազմը չէ. համացանցում նաև արձանագրվել են դեպքեր, երբ օգտատերերին ուղարկվել են նամակներ՝ նշելով, թե COVID-19-ի դեմ պատվաստանյութն արդեն ստեղծված է, սակայն այն թաքցվում է մարդկությունից։ Առավել շատ ինֆորմացիա ստանալու համար օգտատերերին առաջարկվում էր հղումով անցնել «DocuSign» կոչվող ֆեյք էջ, որտեղից էլ արդեն յուրացվում էին անձնական տվյալները։

ԱՀԿ-ն հայտնում է, որ ինֆորմացիայի իսկությունը և կապը իրենց պաշտոնական հաղորդագրությունների հետ կարող են ստուգել՝ կապվելով իրենց հետ և հայտնելով շորթման մասին։