Մամուլում շրջանառվում էր տեղեկություն, թե «ՌԴ կառավարությունը Հայաստանի կառավարության դեմ բողոք է ներկայացրել»՝ խոշոր գործարարի իրավախախտ գործունեություննների պատճառով։ Նշվում էր, թե իշխանությունները չեն նկատում «Ալկո Իմպորտ Էքսպորտ»-ի կողմից կատարվող իրավախախտումները, ինչի արդյունքում Ռուսաստանի ներքին գործերի նախարարությունը դիմել է ՀՀ ՊԵԿ:

Այս առիթով ՏՄՊՊՀ-ն տեղեկացնում է, որ դեռևս 2019 թվականի օգոստոսի 9-ին ՊԵԿ-ի կոմիտեից ստացված գրության հիման վրա վարչական վարույթ է հարուցել «Ալկո Իմպորտ Էքսպորտ» սահմանափակ պատասխանատվությամբ ընկերության դեմ և հոկտեմբերի 22-ի որոշմամբ «Օմսկվինպրոմ» ընկերության հեղինակային իրավունքները խախտելու, մասնավորապես` ընկերությանը պատկանող «ПЯТЬ ОЗЕР» և «БЕЛАЯ БЕРЕЗКА» ապրանքային նշաններով օղիներին մոլորեցնելու չափ նմանվող օղիներ արտադրելու և իրացնելու համար 16 207 000 դրամ տուգանք է կիրառել՝ որպես պատասխանատվության միջոց:

Նշված որոշումները հրապարակված են հանձնաժողովի պաշտոնական կայքէջում և հասանելի են հանրությանը։ Դրանք կարող եք գտնել ՏՄՊՊՀ-ի՝ օգոստոսի 9-ի և հոկտեմբերի 22-ի որոշումներում։ Այս մասին հանձնաժողովի նախագահ Գեղամ Գևորգյանը ԶԼՄ-ներին տեղեկատվություն է տրամադրել նոյեմբերի 4-ին՝ ՀՀ ԱԺ-ում տեղի ունեցած ճեպազրույցի ընթացքում:

Միաժամանակ տեղեկացնում ենք, որ  2019 թվականին «Ալկո Իմպորտ Էքսպորտ» ՍՊԸ-ի նկատմամբ հանձնաժողովը մեկ այլ վարույթի շրջանակում՝ անբարեխիղճ մրցակցության գործողություն իրականացնելու համար, դարձյալ տուգանք էր կիրառել։

Այսպիսով, ՏՄՊՊՀ-ն այս տարի «Ալկո Իմպորտ Էքսպորտ» ՍՊԸ-ի նկատմամբ երկու անգամ տուգանք է կիրառել՝ 32 414 000 դրամ ընդհանուր գումարի չափով։