«Բարձրագույն կրթության և գիտության մասին» օրենքի նախագծի դրույթների վերաբերյալ վերջին շրջանում տարատեսակ քննարկումներ են տեղի ունենում, որոնց ընթացքում հնչում են տարընկալման առիթ ստեղծող գնահատականներ։
Մասնավորապես, «Հենարան» մամուլի ակումբի կայքում հրապարակված՝ «Առաջինը՝ Հայաստան» նախաձեռնության հրավիրած «Կրթություն և արժեհամակարգ» խորագրով քննարկման ընթացքում իրավաբան Արթուր Բուդուրյանն նշել էր‚ թե «Բարձրագույն կրթության և գիտության մասին» օրենքի նախագիծը պետք է քննարկման դրվեր «e-draft.am» կայքում‚ որտեղ տեղադրվում են բոլոր նախագծերը և անցնում հանրային քննարկման փուլ։ Նա նաև նշել էր, որ «օրենքի նախագիծը չի դրվել նշված կայքում‚ փակ քննարկման փուլ է անցել»։
Ինչպես հայտնում է ԿԳՄՍ նախարարությունը՝ օրենքի նախագծի աշխատանքային տարբերակը բաց մասնակցային միջավայրում քննարկվել է բարձրագույն ուսումնական հաստատություններում և գիտահետազոտական կազմակերպությունում, ինչպես նաև հանրային և մեդիա մի շարք հարթակներում։
Ներկայումս նախագիծը, քննարկումների ընթացքում ստացված առաջարկությունների և դիտարկումների հիման վրա, լրամշակվել և նախապատրաստվել է ավելի լայն հանրային քննարկումների, որոնց ավարտին այն սահմանված կարգով տեղադրվելու է «e-draft.am»-ում։
Հարկ է նշել, որ մինչ «e-draft.am»-ում նախագծի հրապարակումը, օրենքի նախագծի աշխատանքային տարբերակը պետք է մի շարք քննարկումների և ուսումնասիրությունների փուլ անցնի՝ ինչպես և նախատեսված է աշխատանքային կարգով։
Մեկնաբանություններ
Մեկնաբանություն թողնելու համար պետք է մուտք գործել կամ գրանցվել:
Մուտք Գրանցվել