ԱԺ պատգամավոր Տիգրան Ուրիխանյանը այսօր գրառում էր կատարել, նշելով՝ «ուսումնասիրության արդյունքներով պարզվել է, որ զինծառայողների սոցհիմնադրամի պաշտոնական հաշվետվության մեջ իսկապես սխալ կա, և փոխանցված գումարները արտացոլված չեն»։ Վարչապետ Նիկոլ Փաշինյանի օգնական Նաիրի Սարգսյանը հայտնում է, որ պատգամավորն այդ եզրակացությանն է եկել՝ իր հետ զրույցից հետո, սակայն վերջինս ոչ ամբողջական է ներկայացրել խոսակցությունն և սխալ հետևություն է կատարել:

«Վերոնշյալ հեռախոսային զրույցի ընթացքում պարոն Ուրիխանյանին տեղեկացրել եմ, որ «Զինծառայողների ապահովագրության» հիմնադրամի տնօրենի հաշվետվության և Ֆինանսների նախարարության կողմից տրամադրված թվերի միջև որոշակի տարբերություն կա: Դա պարզելու համար հինգշաբթի օրը (14.11.2019թ.) հանդիպում է կազմակերպվելու Պաշտպանության նախարարությունում՝ ՊԵԿ-ի, ԿԲ-ի և Հիմնադրամի ներկայացուցիչների հետ միասին՝ հասկանալու խնդրի էությունը: Պարոն Ուրիխանյանին առաջարկել եմ մասնակցել քննարկմանը, որպեսզի հավելյալ հարցեր ունենալու պարագայում դրանք ներկայացնի անձամբ, սակայն՝ ստացել բացասական պատասխան»,- նշում է Նաիրի Սարգսյանը:

Վարչապետի օգնականի խոսքերով՝ քննարկման ժամանակ Հիմնադրամի, ինչպես նաև ՊԵԿ-ի աշխատակիցների կողմից ներկայացվել են լրացուցիչ տեղեկություններ, ինչի արդյունքում պարզ է դարձել, որ Ֆինանսների նախարարության կողմից հիմնադրամին փոխանցված գումարի թիվը ճշգրիտ է և համապատասխանում է հիմնադրամի կողմից հրապարակված տարեկան հաշվետվության թվին:

Նշենք նաև, որ հիմնադրամի կողմից ներկայացված դրոշմանիշային վճարների չափի և ՀՀ վարչապետի կողմից հրապարակված գրանցված աշխատակիցների թվի միջև կարող է լինել տարբերություն, որը բացատրվում է օբյեկտիվ պատճառներով.

1.     ՀՀ-ում առկա են անձինք, ովքեր գրանցված աշխատողներ են, սակայն չեն վճարում դրոշմանիշային վճար, քանզի հաշվետու ժամանակաշրջանի համար չեն ստանում եկամուտ

2.    Ֆինանսների նախարարությունում առկա է տնտեսվարողների կողմից վճարված դրոշմանիշային վճարներ, որոնք դեռևս հիմնադրամին չեն փոխանցվել քանզի տնտեսվարող սուբյեկտները դրոշմանիշային վճարի գծով ունեն պարտավորություններ (վճարված գումարը փոքր է եկամտային հարկի հաշվետվությամբ արտացոլված աշխատողների թվից):

Երկու պատճառներն էլ օրենսդրորեն հիմնավորված են: