Նոյեմբերի 13-ին «Ծեծկռտուքի մասնակիցները մարզպետի ազգականներն են եղել» վերտառությամբ հոդված էր հրապարակվել, որում անդրադարձ էր արվում նոյեմբերի 12-ին Կոտայք ՋՕԸ-ում տեղի ունեցած միջադեպին։ Նշվում էր, թե «Կոտայքի մարզպետ Ռոմանոս Պետրոսյանն իր թեկնածուին է ցանկացել նշանակել որպես ջրօգտագործողների ընկերության պետի պաշտոնակատար, սակայն գյուղացիները դիմադրել են, ծեծկռտուք է սկսվել»։ Ասվում էր նաև, որ Կոտայք ՋՕԸ-ի նոր պետը Ռոմանոս Պետրոսյանի ազգականն է։
Կոտայքի մարզպետարանը հայտնում է, որ տեղեկությունն ամբողջապես սուտ է։
Կոտայքի մարզպետը առհասարակ ՋՕԸ-ի պետ նշանակելու գործընթացներին որևէ կերպ միջամտելու գործիքակազմ չունի, քանի որ վերջիններս նշանակվում կամ ազատվում են բացառապես ՋՕԸ-երի վարչական խորհուրդների կողմից։
Հրապարակման մեջ ներկայացված քաղաքացի Գուրգեն Օսիպյանը ոչ թե Կոտայք ՋՕԸ-ի նոր պետն է, այլ Կոտայք ՋՕԸ-ի՝ Նաիրիի տեղամասի պետի տեղակալն է և որևէ ազգակցական-բարեկամական կապ չունի մարզպետի հետ: Այդ պաշտոնում վերջինս նշանակվել է դեռևս մեկ տարի առաջ՝ Կոտայք ՋՕԸ-ի գործող տնօրենի կողմից:
Միջադեպը, որի մասին նշվում է հրապարակման մեջ, գրանցվել է Կոտայք ՋՕԸ-ի Նաիրիի տեղամասում (Նոր Գեղիի համայնք, 12.11.2019թ), և կապ չունի Կոտայք ՋՕԸ-ի պետի ընտրության հետ: Դեպքը գրանցվել է Նոր Գեղիի մի քանի բնակիչների և ՋՕԸ-ի տեղամասի իրավասու ներկայացուցիչների միջև՝ կապված վերջիններիս մասնագիտական գործունեության հետ: Այս առիթով արդեն իսկ նյութեր են նախապատրաստվում ՀՀ Ոստիկանության Կոտայքի մարզային վարչության Նաիրիի բաժնում, և ոստիկանության կողմից տարածվել է նաև համապատասխան հաղորդագրություն:
Լուսանկարները, որոնք հրապարակվել են հոդվածում՝ իբրև միջադեպի հետ կապված մարզպետի հրավիրած խորհրդակցությունից կադր, հերթական աշխատանքային հանդիպումն էր ՔՊ կուսակցության Աբովյանի գրասենյակում, իսկ նման աշխատանքային հանդիպումներ լինում են շաբաթվա մեջ մի քանի անգամ:
Մեկնաբանություններ
Մեկնաբանություն թողնելու համար պետք է մուտք գործել կամ գրանցվել:
Մուտք Գրանցվել