Ինչպես հայտնում է Արդարադատության նախարարության տեղեկատվության և հասարակայնության հետ կապերի վարչությունը՝ այսօր մամուլում հրապարակված «Քաոս  կալանավայրերում» վերտառությամբ հոդվածում առկա տեղեկությունները որևէ աղերս չունեն իրականության հետ: Լրատվամիջոցի տարածած տեղեկատվության համաձայն՝ «քրեակատարողականների ընդ­հանուր թվով 120 բժիշկներից 50-ն ար­դեն գործազուրկ են, իսկ ազատ­ման դիմումների գլխավոր պարտադրո­ղը ՊՈԱԿ-ի տնօրենի ԺՊ նշանակ­ված Բագրատ Սայադյանն է»։

Նախարարության պարզաբանումը՝ ստորև.

1.     2019 թվականի սեպտեմբերի 24-ից «Քրեակատարողական բժշկության կենտրոն»  ՊՈԱԿ-ի տնօրենը Բագրատ Սայադյանը չէ. ներկայում տնօրենի ժամանակավոր պաշտոնակատարը Արա Հովհաննիսյանն է:

2.     04.10.2019թ-ի դրությամբ Քրեակատարողական ծառայությունից ազատված 108 ծառայող (փաստացի բոլոր ազատվածները) արդեն իսկ ընդունվել է աշխատանքի «Քրեակատարողական բժշկության կենտրոն» ՊՈԱԿ-ում. ներկայում  գործընթացը շարունակվում է:

3.    Ապատեղեկատվություն է նաև Անդրանիկ Բաղդասարյանի միջնորդության հետ կապված տեղեկությունը: Նշենք, որ 04.10.2019 թվականի դրությամբ Անդրանիկ Բաղդասարյանը չի հանդիսանում «Դատապարտյալների հիվանդանոց» ՔԿՀ-ի պետի տեղակալ (31.07.2019 թվականից, իր դիմումի համաձայն, անցել է երկարամյա ծառայության զինվորական կենսաթոշակի):

4.    ՊՈԱԿ-ի բժշկական ստորաբաժանումներում աշխատում են բացառապես համապատասխան բժշկական որակավորում ունեցող անձինք (անասնաբույժի որակավորում ունեցող անձ ՊՈԱԿ-ում չի աշխատում):

5.   Միաժամանակ հայտնում ենք, որ «Քրեակատարողական բժշկության կենտրոն» ՊՈԱԿ-ը պատրաստ է բարձր աշխատավարձով աշխատանքի ընդունել համապատասխան բժշկական որակավորում ունեցող բուժաշխատողների (բժիշկներ, միջին բուժանձնակազմ), ինչի վերաբերյալ Արդարադատության նախարարությունը բազմիցս հանդես է եկել հայտարարությամբ: