Այսօր հայտնի դարձավ, որ նախնական տվյալներով՝ սեպտեմբերի 23-ին Բջնիի առանձնատներից մեկում գլխի շրջանում հրազենային վիրավորումով հայտնաբերվել է ՀՀ նախկին ոստիկանապետ Հայկ Հարությունյանի դին: Դեպքի առթիվ հարուցվել է քրեական գործ՝ քրեական օրենսգրքի 110-րդ հոդվածի 1-ին մասի հատկանիշներով:

Lուրի տարածումից կարճ ժամանակ անց լրատվականներից մեկը, հղում անելով միջադեպին ներկա անձանց, մեջբերել էր Հայկ Հարությունյանի` իբրև վերջին խոսքերը. «Գլխավոր դատախազն ու Սասուն Խաչատրյանը կյանքս կերան էս մի քանի ամիս է ինձ պարտադրում են սուտ ցուցմունք տալ Ռոբերտ Քոչարյանի և Գեղամ Պետրոսյանի դեմ, ախր նրանք մեղավոր չեն»։

Այս լուրը արագորեն տարածվեց լրատվական կայքերով, որին հաջորդեց ՀՀ գլխավոր դատախազի խորհրդական Գոռ Աբրահամյանի արձագանքը.

«ՀՀ գլխավոր դատախազը երբևէ, որևէ միջոցով Հայկ Հարությունյանի հետ կոնտակտ չի ունեցել: Քրեական գործի շրջանակներում այս պահի դրությամբ որևէ տվյալ չի ստացվել ականատես որևէ անձի կողմից նմանատիպ պնդումներ կամ հայտարարություններ արված լինելու վերաբերյալ»։ Հայատարորթյան ամբողջ տեքստը՝ այստեղ։

Հաջորդիվ ՀՀ Քննչական կոմիտեի մամուլի քարտուղար Նաիրա Հարությունյանը տեղեկացրեց, որ Հայկ Հարությունյանի մահվան դեպքի հանգամանքները պարզելու նպատակով հարցաքննվել է դեպքի վայրում նրա հետ գտնվող անձը: Վերջինս հայտնել է Հայկ Հարությունյանի հետ ունեցած խոսակցության բովանդակությունը, որը առնչություն չի ունեցել Մարտի 1-ի դեպքերի առթիվ քննվող քրեական գործի շրջանակներում նրա վրա ճնշումներ գործադրելուն և առհասարակ որևէ անձի կողմից ճնշումներ գործադրելուն:

Այսպիսով, թե՛ ՀՀ դատախազությունը, թե՛ Քննչական կոմիտեն հերքում են վերոգրյալ լուրը։