Ադրբեջանական մամուլում օրերս լայնորեն տարածվում էր մի հոդված, որում ԵԱՀԿ խորհրդարանական վեհաժողովի նախագահ Գեորգի Ծերեթելիին վերագրվել էին խոսքեր, որոնք վերջինս չէր ասել։ Մասնավորապես նշվում էր, թե ԵԱՀԿ ԽՎ նախագահ Գեորգի Ծերեթելին մեղադրել է Նիկոլ Փաշինյանին ղարաբաղյան բանակցությունները խափանելու համար։
ՀՀ արտաքին գործերի նախարարությունը, անդրադառնալով տեղեկությանը, հայտնում է, որ ԵԱՀԿ խորհրդարանական վեհաժողովի ներկայացուցիչները հավաստիացրել են, որ նախագահ Գեորգի Ծերեթելին որևէ անդրադարձ, առավել ևս բնորոշում չի տվել հայկական կողմի, մասնավորապես՝ Նիկոլ Փաշինյանի հայտարարություններին։ Նա աջակցում է ԵԱՀԿ Մինսկի խմբի համանախագահության ձևաչափին, ինչպես նաև կարևորում է խաղաղ գործընթացի առաջմղման համար համապատասխան միջավայրի ձևավորումը։
Նշենք նաև, որ այս հրապարակումից հետո՝ սեպտեմբերի 11-ին, հանդիպում է տեղի ունեցել Վրաստանում Հայաստանի դեսպան Ռուբեն Սադոյանի և Գեորգի Ծերեթելիի միջև, որտեղ, ի թիվս այլ հարցերի, բարձրաձայնվել է նաև հիշյալ հարցը։
Ինչպես հայտնում է ԱԳՆ-ն՝ ադրբեջանական լրատվականները հետին թվով խմբագրել են այդ հարցազրույցը։
Մեկնաբանություններ
Մեկնաբանություն թողնելու համար պետք է մուտք գործել կամ գրանցվել:
Մուտք Գրանցվել