Այսօր՝ սեպտեմբերի 10-ին, մամուլում տեղեկություն էր տարածվել, թե Կրթության, գիտության, մշակույթի և սպորտի նախարարությունում մեկնարկած օպ­տի­մա­լաց­ման շրջանակներում վար­չու­թյան պե­տե­րից ե­րե­քը հրա­ժար­վել են շարունակել աշխատանքը, իսկ այն մար­դիկ, ո­րոնք հա­մա­ձայ­նել են ու տե­ղա­փոխ­վել այլ վար­չու­թյուն, նրանց աշ­խա­տա­վար­ձը կր­ճատ­վել է 5 տո­կո­սով, ինչն օ­րեն­քի խախ­տում է: 

ԿԳՄՍ նախարարությունը հայտնում է, որ պնդումը, թե այլ վարչություններ տեղափոխված աշխատակիցների աշխատավարձերն օրենքի խախտմամբ կրճատվել են 5 տոկոսով, չի համապատասխանում իրականությանը։ 

Կրճատվածը՝ դասային աստիճանի համար հաշվարկվող հավելավճարն է եղել, ոչ թե աշխատավարձը։ Համաձայն «ՀՀ քաղաքացիական ծառայության մասին» ՀՀ օրենքի 47-րդ հոդվածի 13-րդ կետի՝ «Մինչև սույն օրենքն ուժի մեջ մտնելը դասային աստիճանի համար հաշվարկվող հավելավճարը տրվում է տվյալ պաշտոնն զբաղեցնելու ժամանակահատվածում: Պաշտոնի փոփոխության դեպքում հավելավճարը չի հաշվարկվում»։ Այլ կերպ ասած՝ օրենքի խախտմամբ աշխատավարձի նվազում չի եղել։

ԿԳՄՍՆ-ն հավելում է նաև, որ նախարարությունների միավորման արդյունքում բոլոր պաշտոնները թափուր են եղել, և այդ պաշտոններում նշանակումները կամ վերանշանակումները եղել են օրինականության շրջանակում՝ տվյալ պաշտոնում նշանակելու իրավասություն ունեցող պաշտոնատար անձանց կողմից։