Լրատվականներից մեկում «Արագածոտնի մարզպետը PRADO-ով Արցախ է գնացել՝ դուրս գրելով ահռելի քանակի բենզին» վերտառությամբ նյութ էր հրապարակվել, որում նշվում էր, թե Արագածոտնի մարզպետ Դավիթ Գևորգյանը՝ օգոստոսի 5-7-ը, իր ծառայողական մեքենայով՝ ահռելի քանակի բենզին դուրս գրելով, մեկնել է Արցախ՝ մասնակցելու Համահայկական խաղերի բացմանը։

Լրատվականը նշել էր, թե մարզից 7-8 կիսադատարկ ավտոբուս է  մեկնել Արցախ՝ տեղափոխե­լով խաղերի մասնակիցներին, սակայն մարզպետը չի ցանկացել մարզիկների հետ նույն ավտոբուսով մեկնել։ Ըստ լրատվականի՝ Դավիթ Գևորգյանը արարողությանն ընդամենը 2 ժամ է մասնակցել, սակայն Արցախում անցկացրել է 3 օր՝ վատնելով պետական միջոցները: 

Անդրադառնալով վերոնշյալ հրապարակման՝  Արագածոտնի մարզպետարանը հայտնում է.

«Համահայկական խաղերի բացման հանդիսավոր արարողությանը մասնակցելու համար Արագածոտնի մարզից Արցախ են ուղևորվել Աշտարակ, Ապարան, Թալին, Արագածավան և Ծաղկահովիտ համայնքների բոլոր մարզիկները, համայնքների և մարզի պատվիրակությունները:

Մարզկենտրոն Աշտարակից Արցախ են մեկնել ոչ թե 7-8 ավտոբուս՝ այն էլ կիսադատարկ, այլ 1 ավտոբուս՝ Աշտարակ համայնքը ներկայացնող մասնակիցների, և 3 միկրոավտոբուսներ՝ Ապարան, Արագածավան և Ծաղկահովիտ համայնքների մասնակիցների: 

Նշված տրանսպորտային միջոցները ուղևորվել են նստատեղերի ամբողջական հագեցվածությամբ, այնտեղ ազատ նստատեղեր չեն եղել (դրանցով տեղափոխվել են նաև մարզիկների համար նախատեսված մարզահագուստները, հեծանիվներ և այլ սպորտային պարագաներ): Թալին համայնքի այցը Արցախ՝ Համակայկական խաղերի համաշխարհային կոմիտեի որոշմամբ, կազմակերպվել է մարզի մյուս համայնքներից առանձին և այլ ժամանակացույցով:

Համահայկական խաղերի կազմակերպչական աշխատանքներն իրականացրել են մարզպետարանները՝ մարզպետների անմիջական համակարգմամբ, և առնվազն տարօրինակ կլիներ մարզպետի բացակայությունը մարզի պատվիրակության կազմում:
Արցախ այցելության համար Արագածոտնի մարզպետին լրացուցիչ ոչ մի լիտր վառելիք չի հատկացվել, և Արագածոտնի մարզպետը ստացել է օգոստոս ամսվա համար իրեն հասանելիք վառելիքը:

Դավիթ Գևորգյանի այցը Արցախի Հանրապետություն կազմակերպվել է հնարավոր նվազագույն միջոցներով: Ասվածից հետևում է, որ գործուղումը բնավ «թանկարժեք» բնույթ չի կրել: Մարզպետի գործուղման վերաբերյալ տեղեկատվություն ստանալու համար աշխատանքային շաբաթվա վերջին՝ ուրբաթ օրվա ավարտից կարճ ժամանակ առաջ լրատվականը դիմել է մարզպետարան: Մարզպետարանը չի զլացել տրամադրել անհրաժեշտ տեղեկատվությունը, ավելին պատրաստակամություն է հայտնել հարցումը ստանալուն պես սահմանված ժամկետում պաշտոնապես պատասխանել դրան»։

Մարզպետարանը նաև պահանջում է հիշյալ բովանդակությամբ հրապարակումներ կատարած բոլոր լրատվամիջոցներից «Զանգվածային լրատվության մասին» ՀՀ օրենքի 8-րդ հոդվածով սահմանված կարգով «Հերքում» խորագրի ներքո կատարել տեղեկատվության հերքում:

Հարկ է նաև նշել, որ Արագածոտնի մարզպետը Դավիթ Գևորգյանն է, ոչ թե Դավիթ Գրիգորյանը, ինչպես նշված էր նյութում։