Մամուլում տարածված տեղեկությունը, թե Քաղաքացիական ավիացիայի կոմիտեի նախագահ Տաթևիկ Ռևազյանը վերջերս իր աշխատասենյակից դուրս է հրավիրել պոտենցիալ ներդրողի, որը պատրաստակամություն է հայտնել Երևանից դեպի Եվրոպա երկու ուղղություններով կանոնավոր թռիչքներ կազմակերպել, չի համապատասխանում իրականությանը։
Հայաստանի քաղաքացիական ավիացիան հայտնում է, որ Տաթևիկ Ռեվազյանը ամեն օր ունենում է բազմաթիվ հանդիպումներ, սակայն որևէ մեկին երբևիցե իր աշխատասենյակից դուրս չի հրավիրել, առավել ևս, երբ խոսքը գնում է ավիացիոն ոլորտում ներդրումներ կատարելու մասին։
Քաղաքացիական ավիացիայի կոմիտեն ողջունում է բոլոր տեսակի ներդրումային ծրագրերը՝ կապված ավիացիայի զարգացման հետ և իր պատրաստակամությունն ու աջակցությունն է հայտնում նման նախաձեռնություններին:
Ստացվող առաջարկություններն ուսումնասիրվում և քննարկվում են ինչպես կոմիտեի մասնագետների հետ՝ կոմիտեի ներսում, այնպես էլ, հարկ եղած դեպքում, մասնավոր հատվածի մասնագետների հետ: Ստացվող առաջարկություններում եղած խնդիրները հիմնականում չեն առնչվում Քաղաքացիական ավիացիայի կոմիտեի գործառույթների հետ: Նշված խոչընդոտների լուծման նպատակով՝ Քաղաքացիական ավիացիայի կոմիտեն սերտ համագործակցում է պետական կառույցների և մասնավոր հատվածի հետ:
Կոմիտեի և մասնավոր հատվածի համագաործակցության լավ օրինակ կարող է հանդիսանալ 2019 թվականի ընթացքում 2 «CESSNA» տիպի օդանավերի գրանցումը, որը հիմք կհանդիսանան ընդհանուր ավիացիայի զարգացման համար:
Տեղեկացնում ենք նաև, որ առաջարկություններ են ստացվել «RYANAIR» և «WIZZ AIR» ավիաընկերությունների կողմից՝ 2020 թվականի 2-րդ կիսամյակում դեպի Հայաստան թռիչքներ իրականացնելու նպատակով:
Մեկնաբանություններ
Մեկնաբանություն թողնելու համար պետք է մուտք գործել կամ գրանցվել:
Մուտք Գրանցվել